झापा, १४ असार । चालू आर्थिक वर्षमा सवारी दुर्घटनामा परी झापामा ८३ जनाले ज्यान गुमाएका छन् ।
जिल्ला ट्राफिक प्रहरी कार्यालय झापाको तथ्याङ्क अनुसार जिल्लाका विभिन्न स्थानमा १७ सय बढी सवारी दुर्घटना हुँदा ८३ जनाको मृत्यु भएको हो ।
सवारी दुर्घटनामा परी मृत्यु हुने अधिकांश मोटरसाइकल चालक रहेका छन् । दुर्घटनामा १५ देखि ४० वर्ष उमेर समूहका धेरैले ज्यान गुमाएसँगै सवारी दुर्घटना रोक्न झापामा विद्यार्थी केन्द्रीत कार्यक्रम शुरु गरिएको छ ।
सवारी दुर्घटना न्यूनीकरण गर्ने मुख्य उद्देश्यले बिर्तामोड नगरपालिकाले नगरमा सञ्चालित सामुदायिक, धार्मिक र संस्थागत विद्यालयमा एकैसाथ ट्राफिक सचेतनासहितको शिक्षा कार्यक्रम अघि बढाएको छ ।
ट्राफिक सचेतना र सडक सुरक्षा सम्बन्धि विद्यार्थीलाई जानकारी दिने उद्देश्यले शनिवार नगरका सबै विद्यालयका प्रधानाध्यापक तथा सामाजिक विषय अध्यापन गराउने शिक्षकलाई प्रशिक्षण प्रदान गरेको थियो ।
बिर्तामोडका सबै विद्यालयमा अध्ययनरत विद्यार्थीलाई अनिवार्य रुपमा ट्राफिक शिक्षा प्रदान गर्नु पर्ने बताइएको छ । बिर्तामोड नगरपालिका र जिल्ला ट्राफिक प्रहरी कार्यालय झापाको सहकार्यमा अन्तु मिडिया प्रालिले कार्यक्रम आयोजना गरेको थियो ।
कार्यक्रमको उद्घाटन प्रमुख अतिथि बिर्तामोड नगरपालिकाका प्रमुख प्रशासकीय अधिकृत सागर मिश्रले गरेका थिए । सबै विद्यालयमा विद्यार्थीलाई अनिवार्य रुपमा ट्राफिक सचेतना र सडक सुरक्षाका विषयमा सचेतना गराउनु पर्ने उनको जोड थियो ।
शिक्षा, युवा तथा खेलकुद शाखाका प्रमुख तीलचन भण्डारीले स्थानीय पाठ्यक्रममा पनि ट्राफिक सचेतना शिक्षा उल्लेख भएको बताए । उनले पाठ्यक्रममा नै समावेश उक्त विषयलाई ट्राफिक प्रहरीसंगको सहकार्यमा हरेक विद्यालयमा ट्राफिक सचेतना शिक्षा अनिवार्य प्रदान गर्नु पर्ने बताए ।
कार्यक्रममा देवी माविकी प्रधानाध्यापक अम्विका श्रेष्ठले कार्यक्रम प्रभावकारी भएको बताइन् ।
अन्तु मिडिया प्रालिका पत्रकार सुरेन्द्र भण्डारीको अध्यक्षतामा जिल्ला ट्राफिक प्रहरी कार्यालय झापाका प्रहरी निरीक्षक गणेश पौडेलले सहजीकरण गरेको कार्यक्रमको सञ्चालन पत्रकार केशव भट्टराईले गरेका थिए ।
Discussion about this post