मेचीनगर, ४ भदौ । शिक्षा क्षेत्रमा अन्तर्राट्रिय पहिचान बनाउँदै गएको धुलाबारीको इस्ट होराइजनले यसपटक छिमेकी देश चीनसँग सम्बन्ध जोड्न पुगेको छ ।
बुधबार होराइजनले स्कुल परिसरमा आयोजना गरेको पत्रकार सम्मेलनमा चीनको फुजियान राज्यस्थित झाङझाउ कलेज अफ साइन्स एन्ड टेक्नोलोजीसँग भगिनी सम्बन्ध जोडेको जानकारी गराएको हो ।
स्कुलका प्रिन्सिपल सञ्जीव राईले विद्यार्थीहरुलाई व्यवसायिक शिक्षामा अन्तर्राट्रिय सहकार्य सुदृढ गर्ने उदेश्यले चीनको कलेजसँग भगिनी सम्बन्ध कायम गरिएको बताए ।
विश्वस्तरको शिक्षा र व्यवसायिक सीप अभिवृद्विमा जोड्ने गरी चियाको उत्पादन, बजारीकरण, संस्कार र संस्कृति लगायतका विषयमा विद्यार्थीलाई सिकाउन यो सम्बन्धले ठुलो मद्दत पुग्ने अपेक्षा गरिएको उनको भनाई छ ।
यहाँ पढ्ने विद्यार्थीहरुलाई शिक्षा क्षेत्रमा विश्वस्तरसम्म चिनाउन हाम्रो बलबुताले भ्याएसम्म कोशिस गरिरहेको स्कुलकी प्रशासन प्रमुख सावित्रा सापकोटाको दावी छ ।
भगिनी सम्बन्ध अन्तरगत यही भदौ १९ गते स्कुल सञ्चालक र शिक्षकको ४ जनाको टोली चीन जाँदै छ । उनीहरुले कलेजको अध्यायन र अवलोकन गरेपछि सोही अनुसारको योजना बनाउने भएका छन् ।
सहमति अनुसार ६÷६ महिनामा कलेज र होराइजनको अवलोकन भ्रमण भइरहने छ । यताकोटोली फर्केपछि उता कलेजबाट पनि यहाँ आउनेछन् । स्कुलका शिक्षक महेश खड्काले पनि चीनको कलेजसँग भएका सहमतिहरुका विषयमा प्रकाश पारेका थिए ।
संस्थागत स्कुलका रुपमा मेचीनगरमा नमूना बनेको होराइजनले यसअघि दुवईमा शिक्षा अवार्डबाट सम्मानित भइसकेको छ । त्यस्तै भारतको आन्द्र प्रदेशमा ‘कृतज्ञता यात्रा’ मा आफ्नो साँस्कृतिक कला तथा ब्याक्पाइपर ब्याण्ड बाजा प्रस्तुत गरेको थियो ।
स्कुलमा पढाईका साथै अन्य अतिरिक्त क्रियाकलापहरु हुने गरेको छ । विदेशमा उच्च शिक्षा हासिल गर्न जाने विद्यार्थीहरुका लागि स्कुलले क्याम्ब्रीज कोर्ष पनि पढाई रहेको छ ।
यसैगरी स्कुलले विहीबार तीज विशेष भिडियो पनि सार्वजनिक गरिने नृत्य निर्देशक दिवस गिरीले बताए । शुक्रबार तीजको अवसरमा स्कुलका महिला शिक्षकहरुबीच मैत्रीपूर्ण फुटबलमा विजेतालाई पुरस्कारको समेत व्यवस्था गरिएको छ । पत्रकार सम्मेलनको सहजीकरण शिक्षक विकास ग्वालले गरेका थिए ।
Discussion about this post