बिर्तामोड, ७ भदाै । बिर्तामोड-३ स्थित लिङ्कन मन्टेश्वरीमा अध्ययनरत बालबालिकाका अभिभावकहरूलाई बाल मनोविज्ञान सम्बन्धी प्रशिक्षण दिएको छ ।
प्रशिक्षणमा सहभागी अभिभावकलाई बालबालिकाको मानसिक स्वास्थ्य, पढाइ-लेखाइमा देखिने चुनौती, समाधानका उपाय, सकारात्मक सोच, व्यवहारमैत्री वातावरण बनाउन लगायतका विषयमा विद्यालयले जानकारी गराएकाे हाे ।
कार्यक्रमका प्रमुख अतिथि बिर्तामोड नगरपालिकाका प्रमुख पवित्रा महतरा प्रसाईले यस्ताे कार्यक्रमले बालबालिकाको समुचीत विकासका लागि अभिभावक, शिक्षक र विद्यालयबीच त्रिपक्षीय सहकार्य आवश्यक हुने बताइन् ।
उनले प्रशिक्षणले बालबालिकाको मनोविज्ञान बुझ्न र सकारात्मक वातावरण बनाउन ठूलो सहयोग पुग्ने विश्वास गरिन् ।
प्रशिक्षक सोमाली मैनालीले अभिभावकलाई बालबालिकाको मनोवृत्ति, पढाइमा देखिने समस्या, व्यवहारगत परिवर्तन, मानसिक स्वास्थ्य, आत्मविश्वास, घर र विद्यालयबीचको सहकार्य लगायतका विषयमा जानकारी गराएकी थिइन् ।
विद्यालयका सञ्चालक सरोज पौडेलले बालबालिकाको सीप र क्षमता पहिचान गरी उनीहरूलाई सही दिशामा अघि बढाउन अभिभावक र शिक्षकबीच निरन्तर समन्वय हुनु पर्ने बताए ।
उनका अनुसार यस किसिमका कार्यक्रमले अभिभावक र विद्यालयबीचको सम्बन्ध अझ प्रगाढ बनाउन सहयोग पुग्ने छ ।
सोही अवसरमा विद्यालयले तीज विशेष कार्यक्रम समेत गरेको थियो । विद्यार्थी, शिक्षक र अभिभावकहरूले तीज गीत र सांस्कृतिक नित्यहरू प्रस्तुत गरेका थिए ।
यसैबीच शान्ति टोल विकास समितिको नवनिर्वाचित कार्यसमितिलाई विद्यालय परिवारले शुभकामना समेत दिएकाे थियोे ।
विद्यालय व्यवस्थापन समितिका अध्यक्ष दिनेश ओझाको अध्यक्षतामा कार्यक्रम सम्पन्न भएको थियाे ।
Discussion about this post