मेचीनगर, १५ भदाै । ज्यामिरगढीमा आगामी असाेज ३ गतेदेखि प्रथम अन्तर्राष्ट्रिय आमन्त्रणीय त्रिवेणी च्यालेञ्ज कप हुने भएको छ ।
मेचीनगर-१५ स्थित ज्यामिरगढीकाे त्रिवेणी युवा क्लबले आइतबार धुलाबारीकाे मेची उद्योग बाणिज्य संघमा आयोजना गरेकाे पत्रकार सम्मेलनमा असाेज ३ गतेदेखि ११ गतेसम्म फुटबल प्रतियोगिता आयोजना गर्ने भएको जानकारी गराएकाे हाे ।
नकआउट प्रतियोगितामा काेशी प्रदेशका ६ र भारतका २ वटा गरि ८ वटा टिमले सहभागिता जनाउने भएको क्लबका अध्यक्ष विदुरसिंह खवासले बताए ।
उनका अनुसार काेशीका झापा एफसी, ब्रदर एफसी दमक, बेलबारी, सैनिक, रेडहर्स ईलाम तथा भारतकाे मानेभञ्ज्याङ दार्जिलिङ र कर्सेङ्गकाे युके एफसीकाे टिमले भाग लिने छन् ।
प्रतियाेगिताका विजेता र उपविजेतालाई क्रमशः २ लाख र १ लाख नगद राशिसहित ट्रफी, मेडल र प्रमाणपत्र प्रदान गरिने आयोजकले जनाएकाे छ ।
बेष्ट प्यलेर, बेष्ट गाेलकिपर, ईमर्जिङ प्यलेर, म्यान अफ द म्याच लगायतका पुरस्कार पनि वितरण गरिने छ ।
ज्यामिरगढी माविकाे खेल मैदानमा हुने प्रतियोगितासँगै क्लबले दशै-तिहार विशेष कार्यक्रम पनि राख्ने भएको छ ।
स्थानीय कला संस्कृति झल्काउने, नित्य, गीत, युवाहरूलाई खेलकुदकाे माध्यमबाट शिक्षा, संस्कृतिप्रति आकर्षित गर्ने काममा क्लब लागिरहेकाे बताएको छ ।
पत्रकार सम्मेलनमा वडा नम्बर १५ का वडाध्यक्ष गुणराज भट्टराई (राजन) ले वडाले खेलकुदका लागि जम्मा ३ लाख छुट्टाएकाेमा १ लाख रूपैयाँ यस प्रतियोगिताका लागि सहयाेग गर्ने बताए ।
आयोजकले प्रतियोगिता सम्पन्न गर्न करिव २१ लाख खर्चकाे अनुमान गरेकाे छ । खेल सम्पन्न गर्न मुख्य प्रयाेजक, सहप्रायाेजक लगायत विभिन्न दाताहरूबाट सहयाेग संकलन गरिने क्लबका अध्यक्ष खवासले बताए ।
२०५३ सालमा स्थापना भएको क्लबले यसअघि जिल्लास्तरीय फुटबल, पूर्वाञ्चल बक्सिङ प्रतियोगिता लगायतमा सहभागी भइसकेकाे बताइएको छ ।
पत्रकार सम्मेलनकाे सहजीकरण क्लबका सचिव मनिष गहतराजले गरेका थिए ।
Discussion about this post