मेचीनगर, ३ फागुन । राष्ट्रिय प्रजातन्त्र पार्टीले झापा क्षेत्र नं.१ को चुनावी संकल्प पत्र सार्वजनिक गरेको छ ।
आइतबार शिवरात्रीको दिन धुलाबारी स्थित मेची उद्योग बाणिज्य संघको सभा हलमा दिउँसो पत्रकार सम्मेलन गरेर पार्टीले झापा–१ को चुनावी संकल्प पत्र सार्वजनिक गरेको हो ।
पार्टीको तर्फबाट यही फागुन २१ गतेको प्रतिनिधि सभा सदस्यको चुनावका लागि झापा क्षेत्र नं.१ मा मेचीनगर–४ बाहुनडाँगी निवासी प्रोफेसर हेमराज कार्की उम्मेदवार बनेका छन् ।
उम्मेदवार कार्कीले करिव ३४ वटा बुँदाको संकल्प पत्र प्रस्तुत गरेका थिए । संकल्प पत्रमा नेपालमा उत्पादन भएका सुपारीको डीएनए परीक्षणको प्रस्तावलाई खारेज गर्नु पर्ने माग रहेको छ । सुपारी आयातलाई निरुत्साहित गर्ने र स्वदेशी उत्पादनको संरक्षण गर्ने छ ।
यस्तै विपन्न परिवारलाई निःशुल्क आवास र रासनकार्डको व्यवस्थाको पहल गर्ने, बाहुनडाँगी–तारावारी मेची पुल निर्माण, झोलेङ्गे पुल, कालापत्रे सडक, पुल ,कल्पट, सिंञ्चाई, खेलकुद, कृषि, शिक्षा, स्वास्थ्य, जीवन बीमा, पशुपंक्षी बीमा, बाली बीमा, वन्यजन्तुबाट हुने मानविय र अन्य क्षतिको उचित क्षतिपूर्तीको व्यवस्था गर्ने, मानव हात्ती द्वन्द व्यवस्थापन समितिका लागि बजेटको व्यवस्था, धार्मिक तथा पर्यटकीय स्थलको विकासलाई प्रोत्साहन गर्ने, विद्यालयको भौतिक पूर्वाधार, ज्यालादारी, करार, राहत, कर्मचारी, शिक्षकहरुको सेवासुविधाका लागि पहल गरिने, विशेष आर्थिक क्षेत्र (सेज) स्थापना, उद्योगहरुमा लागेको करको दर घटाउने, चिया खेतीका लागि चाहिँने मल र किटनाशक औषधिहरु आयात गर्न साना किसान तथा उत्पादकहरुलाई अनुमती दिने, ५ वर्ष मुनिका बालबालिकाको उपचार निःशुल्क, दीर्घ रोग भएका सबैलाई उपचार निःशुल्क, ग्रामिण आवास कम्पनीको मातहत रहेका जग्गाहरु स्थानीय तहमा ल्याउन अधिकतम प्रयास गरिने लगायत विषयहरु संकल्प पत्रमा उल्लेख रहेको छ ।
जितेर गएको खण्डमा ति विषयहरु संसदमा जोडतोडका साथ उठाउने र समाधानमा लाग्ने उम्मेदवार कार्कीको दावी छ । संकल्प पत्र घोषणा कार्यक्रममा पार्टीका केन्द्रीय सदस्य नरेन्द्रकुमार खड्काले नेपालमा वैदिक सनातन हिन्दु राष्ट्रिय स्थापित गर्नु पर्नेमा जोड दिएका छन् ।
झापा क्षेत्र नं.१ का निर्वाचन परिचालन समिति संयोजक कल्याण खड्काको अध्यक्षतामा सम्पन्न संकल्प पत्र घोषणा कार्यक्रमको सहजीकरण पार्टीका पूर्व मेचीनगर सचिव विशालकृष्ण बाँस्तोलाले गरेका थिए ।
Discussion about this post