दासढुङ्गाको घटना अझै रहस्यमय

जननेता कमरेड मदन भण्डारी र कमरेड जीवराज आश्रितको सडक दुर्घटनामा परि निधन भएको आज २८ वर्ष पुरा भएको छ । कोरोना भाइरसका कारण यसपटक २८ औं स्मृति दिवस कतै पनि मनाइएन । । स्मृति दिवसको कार्यक्रम राजधानी, दासढुङ्गा लगायत मुलुककका विभिन्न ठाँउमा आयोजना गरिने गरिएको थियो । तर, यसपटक कोरोनाले ती सबै कार्यक्रमहरु स्थगित भए । तत्कालीन एमालेका महासचिव भण्डारी र संगठन विभाग प्रमुख आश्रितको २०५० जेठ ३ गते दासढुंगामा जीप दुर्घटनामा मृत्यु भएको थियो । उक्त घटनाको आजसम्म यथार्थ पत्ता लगाउन सकेको छैन । सोहि दिन पोखरामा भएको एमालेको जिल्ला अधिवेशन सकेर चितवनमा अखिल नेपाल महिला संघको भेलामा आउदै गर्दा भण्डारी र आश्रति चढेको पजेरो जीप दुर्घटनामा परेको थियो ।

दुर्घटनामा जिप चालक अमर लामा जिवित रहेका थिए । उनको पनिपछि हत्या हुनुले नागरिकहरुले उक्त दुर्घटनालाई रहस्यमय मान्दै आएका छन् । कमरेड भण्डारी र आश्रितको रहस्यमय दासढुंगा जीप दुर्घटनामा दुःखद् निधन भएको २८ वर्ष बितिसक्दा पनि उक्त घटनाको रहस्य बाहिर नआउनु विडम्बना छ । घटनासँग जोडिएका चालक अमर लामाको रहस्यमय हत्या हुनुले यस घटनालाई झनै रहस्यमय बनाएको छ । त्यसैले दासढुंगा घटनाको यथार्थ पत्ता लगाउन सम्बन्धित पक्षले किन चासो दिएका छैनन् । सडक दुर्घटनाबारे अनुसन्धान नगरेको भन्दै एमाले भित्रै बेलाबेला आलोचना हुने गरेको छ । पटकपटक आफ्नै पार्टीको सरकार हुँदा समेत घटनाको यर्थात पत्ता लगाउन सकेको छैन । यसपटक पनि आफ्नै पार्टीको सरकार हुँदा पनि यस घटनाका विषयमा मौन छ ।

कमरेड मदन भण्डारीकै पत्नी विद्यादेवी भण्डारी राष्ट्रपति र त्यस बेलाका छानबिन समितिका संयोजक अहिलेका प्रधानमन्त्री एवम् एमालेका अध्यक्ष केपी शर्मा ओली नै सरकारमा हुँदासमेत दासढुंगा घटनाको विषयमा अझै अनुसन्धान नहुनुले आम नागरिकमा कौतुहलता बढेको छ । यो घटनाको अनुसन्धान नहुनुले पनि यस्ता अन्य ठुल ठुला घटनाको पनि ढाकछोप भएको छ । दरबार हत्या काण्ड, निर्मलाको बलात्कारपछि भएको हत्या लगायत अन्य ठुला घटना पनि यसरी नै अनुसन्धान नहुदा ओझेलमा परेका छन् । ठुलठुला घटनाको अनुसनधान नहुँदा नागरिकको जहिलै चासोको विषय बन्ने गरेको छ । यस्ता घटनाहरुको तत्काल छानबिन गरी दोषी पत्ता लगाई कडाभन्दा कडा कारवाही गर्न नागरिकहरुले जोडदार माग गरेका छन् ।