क्यान्सर पीडित खत्रीको उपचारका लागि सहयोग जुटाइने

मेचीनगर, ३ बैशाख । क्यान्सर रोगबाट पीडित मेचीनगर–७ स्थित प्यारीभिट्टाका धनबहादुर खत्री तिम्सिना आफ्नो जीवन बचाइदिन मिडियामार्फत सहयोगको अपिल गरेका छन् ।

शनिवार पत्रकार सम्मेलन मार्फत खत्री परिवारले आर्थिक सहयोगका निम्ति सबैसँग आग्रह गरेका हुन् ।

उपचारमा सहयोग पुर्याउने उद्देश्यले प्रेस क्लब मेचीनगरले पीडित परवारको घरैमा पुगेर पत्रकार सम्मेलन आयोजना गरेको थियो ।

पत्रकार सम्मेलनमा धनबहादुरले गहभरी आँसु पार्दै भने, ‘मलाई अझै बाँच्न रहर छ । उपचारमा सहयोग गरिदिनु होस ।’ उमेरले ७० पुगेका खत्रीको गत असारमा स्वस्थ्यमा समस्या भएपछि उपचारको लागि भारतको सिलगडी, नेपालको धरान, भरतपुर, बिर्तामोड लगायतका ठाउँमा परिवारले उपचारका लागि पुर्याएका थिए ।

घाँटीको बाहिरपट्टि सानो फोको देखिएपछि उपचारका लागि धरानस्थित वीपी कोइराला स्वास्थ्य विज्ञान प्रतिष्ठन पुगेका खत्री त्यसबेला छाँगाबाट खसे जव उनलाई डक्टरले क्यान्सर भएको प्रमाणित गरेका थिए । त्यसपछि चिकित्सकले उनलाई थप उपचारका लागि भरतपुर लैजान सल्लाह दिएका थिए ।

चिकित्सककै सल्लाहमा भरतपुर लगिएको थियो । त्यहाँ अलिक सहज नभएपछि पूर्वाञ्चल क्यान्सर अस्पताल बिर्तामोडमा हाल उनको उपचार भइरहेको छ ।

आर्थिक रुपमा अत्यन्तै कमजोर खत्री परिवार उनै धनबहादुरको सहारमा आश्रीत थियो । सडक, बाटो, तथा घर बनाउने मजदुरी काम गरेर जीवन निर्वाह गर्दै आएका धनबहादुर थलिएपछि उनको उपचारमा आर्थिक संकट परेको छ ।

धनबहादुको उपचारमा हालसम्म ७ लाख खर्च भइसकेको उनका ज्वाई गणेश वस्नेतले बताए । उनले हामीले ऋण पान गरेर बुबाको उपचार गरिरहेको छौं तर थप उपचारको लागि पैसा छैन । पत्रकार सम्मेलनमा उनले भने, ‘बुबाको उपचारमा सहयोग गरिदिनु होला ।’

प्यारीभिट्टा जनता टोल विकास समितिका अध्यक्ष घनश्यम लामिछानेले धनबहादुरको उपचारमा आर्थिक सहयोग जुटाइ दिन आग्रह गरे ।

‘जम्मा भएको १२ धुर जग्गा बेच्दा त उपचार हुन्थ्यो होला’, लामिछानेले भने–‘घरबेचेको भोलिपल्ट यो परिवार रुखको फेदमा गएर बस्नुपर्छ । खत्रीको उपचारमा तत्काल ३ लाख आवश्यक पर्नेछ ।’

प्यारीभिट्टा युवा क्लबका अध्यक्ष मुक्तिनाथ निरौलाले धनबहादुरको उपचारका लागि सहयोग जुटाउने काम भइरहेको बताए । उनले भर्खरै सम्पन्न प्यारीभिट्टा महोत्सवबाट उठेको केहि पैसा र अन्य साथिहरुसँग संकलन गरेर उपचारमा सहयोग गर्ने बताएका छन् ।

नेपाल पत्रकार महासंघका पर्व केन्द्रीय सदस्य मोहन काजी, प्रेस क्लब मेचीनगरका अध्यक्ष डम्बर बरालले पनि मिडिया मार्फत उपचारका लागि सहयोग पुर्याउन मद्दत गर्ने बताए ।