कुमार लिङ्देन पदमुक्त, चार पार्टीबीच एकीकरण

झापा, २१ बैशााख । संघीय लोकतान्त्रिक राष्ट्रिय मञ्चले अध्यक्ष कुमार लिङदेनलाई पदमुक्त गरेको छ ।

मञ्चको बहुमत सदस्य सहभागी बैठकले लिङदेनलाई पदमुक्त गरेको हो ।

लिङदेन १८ बर्षदेखि मञ्चको एकलौटी अध्यक्ष थिए । लिङदेनलाई कारवाही गरेको समुहले उपाध्यक्ष ज्ञानबहादुर गुरुङलाई अध्यक्षको जिम्मेवारी दिएको छ । लिङदेनले पार्टी सञ्चालन गर्न नसकेको आरोप गुरुङ समुहको छ ।

लिङदेनले आर्थिक अनियमितता गरेको, सामाजिक तथा सांस्कृतिक विचलनमा परेको, संगठनका कार्यकर्तासँग रकम लिएर फिर्ता नगरेको, पहिचान पक्षसँग सहकार्य गर्न नमानेको, पहिचानको आन्दोलनलाई कमजोर बनाएको लगायतका ४४ बुँदे आरोप लगाउँदै उनलाई पदमुक्त गरिएको हो ।

लिङदेनले विदेशी सहायता दुरुपयोग गरेकोदेखि पार्टीलाई आफ्नो व्यक्तिगत कम्पनी बनाएको आरोप जारी प्रेस बिज्ञप्तिमा छ ।

लिङदेनले विभिन्न विदेशी शक्तिसँग साँठगाँठ गरेर उसैको निर्देशनमा पार्टी र पहिचानको मुद्दा ध्वस्त बनाएको आरोप गुरुङ समुहले लगाएको छ । यसअघि भएका निर्वाचनमा विदेशी अस्थिरतावादी शक्तिसँग मिलेमतो गरी सहभागी हुन नदिएको समेत आरोप उनीमाथि लगाइएको छ ।

लिम्बुवान नेता धनबहादुर पन्धाकले मञ्चको विधान बमोजिम बहुमत सदस्यले तत्कालिन अध्यक्ष लिङदेनलाई पदमुक्त गरेको जानकारी दिए । २८५ जना केन्द्रिय सदस्य रहेको मञ्चको १६३ जना सदस्य उपस्थित भएको बैठकले लिङदेनलाई पदमुक्त गरेको उनले बताए ।

लिङदेनलाई कारवाही गरेको समुहले चार पार्टीबीच एकीकरण गरेको घोषणा गरेको छ । एकीकृत पार्टीको नाम ‘नागरिक उन्मुक्ति पार्टी (एकीकृत)’ रहने सहमति भएको छ ।

एकीकृत पार्टीको संघीय अध्यक्ष गुरुङ छन् भने पार्टी अध्यक्ष सांसदसमेत रहेकी नागरिक उन्मुक्ति पार्टीकी अध्यक्ष रञ्जिता श्रेष्ठ रहेकी छन् । कोचिला एकता संघर्ष समिति, नागरिक शसक्तिकरणका लागि जागरण अभियान, नागरिक उन्मुक्ति पार्टी र मञ्चबीच एकीकरण भएको हो ।

एकिकृत पार्टीमा संघीय लोकतान्त्रिक राष्ट्रिय मञ्च, नागरिक उन्मुक्ति पार्टी, कोचिला एकता संघर्ष समिति र जागरण अभियानका नेता कार्यकर्ताको सहमतिका साथ व्यवस्थापन गरिने संघीय अध्यक्ष गुरुङले बताए । पार्टी एकिकरणमा भएको १० बुँदै सहमतिलाई सबै पक्षबाट कार्यान्वयन गरिनेसमेत उनले जानकारी दिए ।

यता कुमार लिङदेनले भने पार्टीका केही नेताहरु नागरिक उन्मुक्ति पार्टीमा प्रवेश गरेको टिप्पणी गरेका छन् ।

सामाजिक सञ्जालमा आफ्ना धारणा राख्दै लिङदेनले सक्रिय राजनीतिक दलको केही नेता कार्यकर्ताद्धारा हत्या गर्ने प्रयास गरिएको बताएका छन् । पार्टी बचाउन कानुनी तथा राजनीतिक लडाइ लड्न तयार रहेको समेत उनले बताएका छन् ।