झापा, १७ असार । मनमोहन प्राविधिक विश्वविद्यालयका उपकुलपति डा.सुवासश्री पोखरेलले स्वार्गीय मनमोहन अधिकारी नेपालको लोकतान्त्रिक आन्दोलनका त्यागी, सादगी र आदर्श नेता भएकाले उनको व्यक्तितत्वलाई सबैले अनुशरण गर्नुपर्ने बताएका छन् ।
स्व. मनमोहनको १०३ औँ जन्मयन्तीको अवसरमा मनमोहन प्राविधिक विश्वविद्यालयमा शनिवार आयोजित कार्यक्रममा उपकुलपति पोखरेलले मनमोहनको त्याग र निष्ठाकै कारण देशमा प्रजातन्त्रको उदय भएको र निरंकुश पञ्चायती व्यवस्था ढलेर देशमा प्रजातन्त्र आएको बताए ।
उनले स्वर्गीय नेता मनमोहनले प्रधानमन्त्रीका रुपमा नेतृत्व गरेको नौ महिने कार्यकाल हालसम्म देशकै नमुना बन्न सफल भएकोमा आफुलाई गर्व लागेको बताए । उनले भारतको स्वतन्त्रता आन्दोलनमा समेत योगदान गरेका नेता मनमोहन प्राविधिक शिक्षापे्रमी भएकोले उनकै परिकल्पनालाई सार्थक बनाउन मनमोहन प्राविधिक विश्व बिद्यालय बन्न सफल भएको स्मरण गराए ।
विश्वविद्यालयका रजिस्टार डा.दिलनाथ फुयालले स्वर्गीय नेता मनमोहन अधिकारीले सधै त्यागलाई प्राथमिकता दिएकोले उनलाई कुनै एउटा पार्टीको चश्मा लगाएर मात्र हेर्नु गलत हुने बताए ।
मोरङको बुढीगंगा गाउँपालिका–४ हात्तीमुढा स्थित प्राविधिक विश्वविद्यालयमा मनमोहन जयन्तीको अवसरमा विश्वविद्यालयको ईन्जिनियरिङ संकायतर्फको स्नताक तह र आंगिक क्याम्पस पोलिटेक्निक तर्फका उत्कृष्ट विद्यार्थीहरुलाई सम्मानसहित प्रमाणपत्र वितरण गरिएको थियो ।
कार्यक्रममा उपकुलपति डा.पोखरेल, रजिस्टार फुुँयाल, ईन्जिनियर संकायका डिन प्राडा.प्रचण्डमान प्रधान, ईलेक्ट्रिोनिक्स विभागीय प्रमुख डा.दिपरत्न डंगोल, निमित्त परीक्षा नियन्त्रक भिम काफ्ले र मनमोहन पोलिटेक्निकका प्रिन्सिपल सुदिप अधिकारी लगायतले विद्यार्थीहरुलाई सम्मानसहित प्रमाणपत्र वितरण गरेका थिए ।
सो अवसरमा मनमोहनको पूर्णकदको प्रतिममा माल्र्यापण र विश्वविद्यालय परिसरमा बृक्षारोपण कार्यक्रम समेत सम्पन्न गरिएको थियो ।
Discussion about this post