बिर्तामोड, १७ चैत । नेकपा एमाले झापाको ११ औँ जिल्ला अधिवेशनमा अध्यक्षमा प्रेमबहादुर गिरी र उपाध्यक्षमा शिव ढुंगेलको मात्र मनोनयन पत्र दर्ता भएको छ ।
आज बिर्तामोड स्थित अग्रसेन भवनमा दिउँसो उम्मेदवारको नोमिनेशन दर्ता समय अवधिमा अध्यक्ष पदमा प्रेमबहादुर गिरी र उपाध्यक्ष पदमा शिव ढुंगेलको मात्र उम्मेदावारी परेको हो ।
त्यस्तै सचिवमा २ जना उम्मेदवारको नाम परेको छ । सचिव पदमा तुलसी कार्की र भोजराज घिमिरेले नोमिनेशन दर्ता गराएका छन् ।
यसैगरी उपसचिव पदमा ४ जनाको उम्मेदवारी परेको छ । उपसचिवको एक जना महिला पदमा अनिता कन्दङ्वा, असारु राजबंशी, टिकाराम मंग्राती र चन्द्र सुब्बाले नोमिनेशन दर्ता गराएका छन् ।
उपसचिवको महिला पदमा अनिता कन्दङ्वाको मात्र मनोनयन पत्र दर्ता भएको छ । एक जना पुरुष उपसचिव पदका लागि ३ जनाको मनोनयन पत्र दर्ता भएको छ ।
यद्यपि निर्वाचन समितिले उनीहरूको नाम आधिकारिक रुपमा घोषणा गर्न बाँकी छ । नोमिनेशन गरेका उम्मेदवारहरुको अन्तिम नामावली आजै राति ९ वजे सम्ममा प्रकाशित हुनेछ ।
भोलि निर्वाचन गर्ने तयारी गरिएको थियो । तर, आज दिउँसो बिर्तामोडमा नै बसेको नेतृत्वको छलफलले सोमबार सम्ममा सहमती नभए पर्सी निर्वाचन गर्ने निर्णय भएको श्रोतले जनाएको छ ।
भोलि आ–आफ्नो पालिकाहरुमा छलफल गरेर अन्तिम नाम ल्याउने, नामहरु आउन नसके मंगलबार चुनावमा जाने सल्लाह भएको एक नेताले बताएका छन् । पर्सी चुनावमा जिल्ला पार्टी कार्यालयमा हुने बताइएको छ ।
ती नेताका अनुसार आज अध्यक्ष केपी शर्मा ओलीले अध्यक्षमा गिरी र उपाध्यक्षमा ढुंगेललाई चयन गर्न निर्देशन दिएसँगै उनीहरु निर्विरोध भएका हुन् ।
अधिवेशनमा पालिकाबाट ४३० जना, जनसंगठनहरूबाट ८९ जना, मजदुरबाट ३० जना, सल्लाहकारहरू २५ जना, सम्पर्क मञ्चबाट पाँच जना र आयोजक १६९ जना एवम् मनोनीत प्रतिनिधिहरू ३८ जना गरी ७८६ जना सहभागी भएका छन् ।
जिल्ला अधिवेशनबाट ५ जना पदाधिकारीसहित १५० जनाको कमिटी बन्ने छ । विभिन्न जनवर्गिय संगठनहरुबाट पछि थप १५ जना मनोनित समेत हुने छन् । विहीबार अधिवेशनको उद्घाटन एमाले अध्यक्ष ओलीले गरेका थिए ।
Discussion about this post