बिर्तामोड चिल्ड्रेन हस्पिटल : एक वर्षमा ६ हजार विरामीको उपचार

झापा, १० असोज । बिर्तामोड चिल्ड्रेन हस्पिटलले गत एक वर्षमा ६ हजार ३ जना विरामीको उपचार गरेको छ ।

आज हस्पिटलको तेस्रो बार्षिकोत्सव कार्यक्रममा सञ्चालकले यस्तो कुरा बताएका हुन् ।

बिर्तामोड चिल्ड्रेन हस्पिटलका मेडिकल डाइरेक्टर एवम् बालरोग विशेषज्ञ डा. रुपक आचार्यले हस्पिटलमा भर्ना भएका मध्ये ९९ दशमलव ९ प्रतिशत विरामीको सफल उपचार भएको दावी गरेका छन् ।

डा.आचार्यले गत एक वर्षमा दुई हजार १७८ जना मध्ये ९९.९ प्रतिशत विरामीको सफल उपचार गरेको उनले बताए ।

उनका अनुसार दुई हजार ७५१ जना विरामीलाई ओपिडी सेवा, एक हजार ७४ जना विरामीलाई इमरजेन्सी सेवा, भर्ना भएका ३ प्रतिशत विरामीलाई मात्रै आईसियुमा राख्नु परेको, ९७ प्रतिशत विरामीलाई वार्डमा राखेरउपचार सेवा प्रदान गरिएको छ ।

यसैबीच एक वर्षको अवधिमा एक जना विरामीलाई अथक प्रयासका बावजुद पनि बचाउन नसकिएको डा. आचार्यले जानकारी दिए ।

हस्पिटलमा अधिकांश नवजात शिशु अर्थात एक वर्ष मुनिका बालबालिका उपचार गर्न आउने भएकाले डाक्टरको टिम, सञ्चालक लगायत सबै कर्मचारी संवेदनशिल भएर काम गरिरहेको हस्पिटलकी अध्यक्ष लिला मैनालीले बताइन् ।

२०७९ असोज १० गते १५ शय्या वेडबाट हस्पिटल सुरु गरिएको थियो । उक्त हस्पिटललाई भविश्यमा अत्याधुनिक भवनसहित शय्या थप गरेर विस्तार गर्ने योजना रहेको उनले बताइन् ।

मेनेन्जाईटिस, मुटुको विरामी, दिमागमा अक्सिजनको कमी, बाथ रोग, मृग्रौला रोग लगायत जटिल रोगका विरामीहरुको सफल उपचार र अटिजम रोग समेत पत्ता लगाएको हस्पिटलको भनाई छ ।

हस्पिटलले एक वर्षमा २४ लाख २४ हजार ३०९ रुपैयाँ विभिन्न उपचार सेवामा छुट दिइएको बताएको छ । फार्मेसीमा दुईलाख ५५ हजार १६५ रुपैयाँ, आईसियुमा ५ लाख १८ हजार ६५० रुपैयाँ, वार्डमा १६ लाख एक हजार ७३१ रुपैयाँ, ओपिडीमा २२ हजार २३७ रुपैयाँ, अन्य विभिन्न शिर्षकमा करिव ३० हजार छुट दिइएको छ । त्यस्तै निको भएर गएका थप विरामीबाट दुईलाख १९ हजार ५८७ रुपैयाँ उठेन बाँकी रहेको हस्पिटलले जनाएको छ ।

कार्यक्रममा नेपाल पत्रकार महासंघ झापा शाखाका अध्यक्ष एकराज गिरी, बिर्तामोड–१ स्थित नमुना टोलका अध्यक्ष विजयकुमार बुढाथोकी लगायतले शुभकामना मन्तव्य व्यक्त गरेका थिए ।

बिर्तामोड चिल्ड्रेन हस्पिटलका अध्यक्ष लिला मैनालीको अध्यक्षतामा सम्पन्न बार्षिकोत्सवको कार्यक्रमको स्वागत डा.सुजता मैनाली आचार्यले र सञ्चालन पत्रकार लिला अनमोलले गरेकी थिइन् ।

भिडियाे पनि हेर्नू हाेला ।