। समाचार प्रभाव ।
काँकरभिट्टा, ३ चैत । मेची भन्सार कार्यालयकाे सहकार्यमा नेपाल प्रहरी र सशस्त्र प्रहरीकाे संयुक्त गस्ती टाेलीले आज-भाेलि रातकाे समयमा सीमा नाकामा निगरानी बढाएकाे छ ।
केहिदिन अघि नकलबन्दाबाट भन्सार छलेर गाई-गाेरू, राँगा-भैंसी, सुपारी, चाइनिज लसुन भारत लाने तथा माेटरपाटर्सका सामान, कपडा, हाडवेयर लगायत यता ल्याउने गरिरहेकाे समाचार र भिडियो बाहिर आएपछि प्रहरीले नाकामा अवैध समानहरू भेटे बरामद र मान्छेलाई नै नियन्त्रणमा लिने गरी काममा खटिएको छ ।
अहिले मेची पुलमा सामान राखेर अवैध धन्दा गर्ने, सतिघट्टा, बर्मेली टाेल, नकलबन्दा, र तिरङ सम्मकाे क्षेत्रमा मेची खाेलामा प्रहरीले दिउँसो र राति निगरानी गर्न थालेकाे छ ।
प्रहरीले भन्सार छलेका केही अवैध सामान बरामद पनि गर्न थालेकाे छ ।
नेपाल प्रहरी र सशस्त्र प्रहरी काँकरभिट्टाका प्रमुख डीएसपी निमेश चापागाईं र विकास थापा मगरले तिरिङ, बाहुनडाँगी, नकलबन्दा सतिघट्टाका सीमा नाका नजिकका चाैकी, वीओपी, जनप्रतिनिधि र स्थानीयसँग छलफल गरिरहेका छन् ।
मेची भन्सार कार्यालय काँकरभिट्टाका प्रमुख शिवलाल न्याैपानेले अवैध रूपमा भन्सार छलेर ल्याएका र भारत लान लागेका सामानहरू भेटे स्पाेर्टमा कारवाही हुने बताए ।
उनका अनुसार भन्सारका प्रतिनिधि, नेपाल प्रहरी र सशस्त्र प्रहरीले संयुक्त रूपमा गस्ती गरिरहेकाे छ ।
मेचीनगरमा चाइनिज लसुन, विदेशी सुपारी लगायतका सामान भारत लाने गरीकाे गाेदाम राखेकाे छ भने शंका लागे त्यसकाे पहिचान गरि राजश्व अनुसन्धान कार्यालय इटहरीकाे समन्वयमा हाम्रा प्रतिनिधि र सुरक्षाकर्मीहरूले गाेदाममा छापा हान्न सक्ने उनकाे भनाई छ ।
Discussion about this post