मेचीनगर, ३ चैत । जेनजी सरकारले चालू आर्थिक वर्षका लागि मेचीनगरलाई छुट्टाइएकाे स्वीकृत १५ कराेड बजेट राेकेकाे छ ।
सरकारले चालू आर्थिक वर्ष २०८२/८३ का लागि मेचीनगर नगरपालिकाकाे विभिन्न शिर्षककाे ५ वटा सडक निर्माणका लागि १५ कराेड स्वीकृत बजेट स्थगित गरेकाे हाे ।
अघिल्लो सरकारकाे पालामा बजेटकाे राताे कितावमा मेचीनगरलाई परेकाे साे बजेट भदाै २३ र २४ गतेपछिकाे सरकारले राेकेकाे नगरप्रमुख गाेपालचन्द्र बुढाथोकीले जानकारी दिए ।
चालू आर्थिक वर्ष २०८२/८३ काे राताे कितावमा परेकाे स्वीकृत बजेट भाैतिक पूर्वाधार तथा यातायात मन्त्रालयले ३ कराेड राधास्वमी-स्याङ्ल्याङ्टार सडकलाई छुट्टाएकाे थियाे ।
साे मन्त्रालयबाट विनियोजन भइ सडक डिभिजन कार्यालय दमकले सर्भे समेत गरिसकेकाे थियाे ।
यसैगरी, शहरी विकास मन्त्रालयले ३ कराेडकाे स्वीकृत बजेट अन्तरगत मेचीनगर-१२ स्थित भद्रकाली चाेकदेखि कालीझाेडा सम्मकाे सडक, मेचीनगर-१४ स्थित धाइजन चाेकबाट दक्षिण कृष्ण आधारभूत विद्यालय सम्मकाे ३ कराेड बजेटकाे सडक, मेचीनगर-१२ काे शहरेडाँगी देवी मार्ग- श्रीजंगा मार्ग जाेड्ने ३ कराेड बजेटकाे सडक र मेचीनगर-६ स्थित भट्टराई चाेकदेखि उत्तर नकलबन्दा चाेक हुँदै दुर्गा मन्दिर सम्मकाे ३ कराेड बजेटकाे दुई किलोमिटर कालाेपत्रे सडककाे निर्माण गर्न राेकिएकाे नगरपालिकाले जनाएको छ ।
सम्बन्धित मन्त्रालयलाई स्थगन गरिएको सडक निर्माण सूचारू गरिदिन पटक-पटक पत्र पठाएर अनुराेध गर्दा पनि सूचारू नगरिदिएको नगरप्रमुख बुढाथोकीकाे गुनासाे रहेकाे छ ।
मंगलबार पनि नगरपालिकाले सम्बन्धित मन्त्रालयलाई पत्र लेखेर साे सडकहरू स्थगन नगरिदिन अनुराेध गरेकाे छ ।
Discussion about this post